Lider ng Maute todas sa Bomba ng Militar

Patay umano sa isinagawang air strike operation ng tropa ng sundalo si Omar Maute, isa sa lider ng Islamikong Stado ng Iraq at Syria (ISIS) grupong Maute sa siyudad ng Marawi.

Ayon sa Balitang Ahensiya ng Ahlul-Bayt (ABNA24) - Ito ang inihayag kahapon ni AFP Chief of Staff Gen. Eduardo Año base sa nakalap nilang impormasyon, subalit ito ay kasalukuyan pang kinukumpirma.

“Mayroon kaming ulat na si Omar Maute ay namatay sa panahon ng isa sa mga airstrikes ngunit kailangan namin patunayan ito nang mabuti,” pahayag ni Año kung saan ang insidente ay naganap kamakailan.

Nabatid na tinatayang nasa 100 pang terorista ang patuloy pa ring nakikipaglaban sa lugar ng Bangolo sa siyudad ng Marawi.

Nabatid kay Año na ang kapatid ni Omar na si Abdullah Maute at Isnilon Hapilon, Commander ng Abu Sayyaf na siyang tumatayong Emir ng ISIS sa STimog-silangan ng Asia ay kabilang sa mga teroristang nakakalaban ng tropa ng mga sundalo sa Bangolo area.

Magugunita na noong Lunes ay nag-alok ng karagdagang P 10-M gantimpala si Pangulong Rodrigo Duterte kay Hapilon at tig P5-M para sa magkapatid na Maute.

Sinabi ng Chief of Staff na nasa posisyon na sila ng ‘closed quarter battle’ sa bahagi na inookupa ng mga snipers ng mga tero¬rista na nakakapagpabagal sa operasyon.

Inihayag pa ni Año na magdaragdag sila ng panibagong tropa sa siyudad ng Marawi upang bantayan ang mga lugar na nalinis na sa mga elemento ng mga terorista at ng matiyak na hindi basta makakabalik sa lugar at makapaglunsad uli ng terorismo.